منو القال القراية كتاب

منو القال القراية كتاب برجل ومسطرة وشنطة
ومنو القال العلم بينير عقولا الله يوم سخطا
جمال وحلاوة التعليم يبل في حالة الغلطة
ويوريك كيف تعامل الناس وتمحي الارتكبتو خطأ
**وبرضو تقولي لي بقرا**
حليل زمن القراية زمان سلوك الطالبة في العفة
وزمان الواحدة كان بتخاف تقابل استاذا بالصدفة
تخاف من مرقة الدكان وقولة ادخلي ياقصفة
ولو شافت خيال استاذ تزوق وتكمل اللفة
**وبرضو تقولي لي بقرا**
حليل زمن القراية زمان
اسع وين بقي الاستاذ فايت الطالبة في الخفة
وتلقي بلا خجل منداح ولابس في اليمين حرفا
يكلما عن معاني الحب يبالغ ضما في وصفا
ويعزما في ضفاف النيل ويضحك رافع الكلفة
**وبرضو تقولي لي بقرا**
حليل زمن القراية زمان
حليل زمن القراية زمان
زمن بقت القراية قروش شعار المدرسة الخاصة
اعلانات واغراءات وأوعي تفوتك الفرصة
خصخصة حتي في التعليم معلم راتبو بالحصة
معلم ولا حافر ابيار يصرف الحصة بالحصة
**وبرضو تقولي لي بقرا**
حليل زمن القراية زمان
زمان وكتين قرينا يمين تخاف من نظرة الألفة
تكون حافظ يجي التسميع تنسي الحافظو بالخوفة
تقنب لا خبر لا حس ترجي الفسحة بي لهفة
هسع وين بقي الطالب يقاسم استاذو في السفة
**وبرضو تقولي لي بقرا**
حليل زمن القراية زمان
زمان الناس تعاني سنين عشان ما تدخل الجامعة
وكانوا بيقروا بالفانوس ولمبة جاز ومو شمعة
تلقي عيونا بالدخان محمرة تقطر الدمعة
ولما تهب رياح وتموت تقوم واقف بلا توعا
تلز باب التكل عجلان قبل ما تطلق الشرعة
وتدخل حافي حلق النار عشان ما تفتش الولعة
**وبرضو تقولي لي بقرا**
قدر الكان حفظتو يروح تحوص وتنوس قريب ساعة
تمرق ايدك من الجالون تدلق السمنة في القرعة
تكون أمك هناك قامت تقول لك يا ولد أوعا
وتعال منسل كشحت شنو ويجيك عقاب كلاما دعا
**وبرضو تقولي لي بقرا**
حليل زمن القراية زمان
انا خليني يمكن جيت في زمن انطلاق سرعة
ابوي من قام صغير درفون ماسك أول الدفعة
ويوم ذاعو المذيع في الرادي هزت و فرحت القلعة
ونجاحو مو نجاح انسان صبر شان يدخل الجامعة
ونجاحو نجاح بلد بي حالا منها أول الدفعة
**وبرضو تقولي لي بقرا**
حليل زمن القراية زمان
نحن قرينا بي العراقي وانتو قريتو باللبسة
نحن قرينا بالفانوس وانتو قريتو باللمبة
وانتو قعدتو في الأدراج ونحنا قعدنا في الكنبة
ورغم انو اللبس عراقي كانو بقولو ديل طلبة
وبرضو تقولي لي بقرا
وبرضو تقولي لي بقر

» منو القال الشوايقة جلود
» خير جليس في الزمان كتاب
» من كتاب السيرة النبوية للدكتور محمد احمد محمود